ئەمڕۆ سێشەممە ٢٠٢٦/٩/١ بەڕێز شێخ جەعفەر شێخ مستەفا، جێگری سەرۆکی هەرێمی کوردستان، پێشوازییکرد لە بەڕێز کاپتن فرانچسکۆ رۆبینۆ و شاندێکی یاوەری، بە بۆنەی کۆتاییهاتنی ئەرکەکەی وەک بەرپرسی سەربازیی هێزی تایبەتی ئیتاڵیا لە چوارچێوەی هێزەکانی هاوپەیمانیی نێودەوڵەتیی دژ بە داعش.
لە دیدارەکەدا بەڕێز جێگرى سەرۆکی هەرێم سوپاسی ئەرک و ماندووبونەکانی بەڕێز کاپتن فرانچسکۆ رۆبینۆ و تیمەکەی لە ماوەی رابردوودا کرد و هیوای سەرکەوتنی لە ئەرک و کاری داهاتوویاندا بۆ خواستن، هەروەها هاریكارییە سەربازییەکانی ئیتاڵیای لە پەرەپێدانی توانا سەربازییەکان و دامەزراندنی بنکەی سەربازیی تایبەت بە مەشق و راهێنان بۆ پێشمەرگە بەرز نرخاند.
هەر لە دیدارەکەدا بەڕێز جێگری سەرۆکی هەرێم، بەخێرهاتن و پیرۆزبایی دەستبەکاربوونی لە تیمی سەربازیی نوێ کرد و پاڵپشتیی هەرێمی کوردستانی بۆ زیاتر پەرەپێدانی پەیوەندییەکانی نێوان هەردوولا، دووپات کردەوە.