جێگری سەرۆکی هەرێم لەگەڵ شاندێکی سەربازیی ئەڵمانیا کۆبووەوە

بەڕێز شێخ جەعفەر شێخ مستەفا، جێگری سەرۆکی هەرێمی کوردستان پێشوازیی لە بەڕێز کۆڵۆنێڵ ثۆرستن پیچا، راوێژکاری سەربازیی ئەڵمانیا لە هاوپەیمانیی نێودەوڵەتیی دژ بە داعش و شاندێکی یاوەری کرد.

لە کۆبوونەوەکەدا پەیوەندییەکانی ئەڵمانیا لەگەڵ هەرێمی کوردستان، دوایین پەرەسەندنە سیاسی و ئەمنییەکانی عێراق، هەڕەشە و مەترسییەکانی داعش بۆ سەر ناوچەکە و هاوکارییە سەربازییەکانی هاوپەیمانان بۆ پێشمەرگە، تاوتوێ کران.

هەردوولا جەختیان لە گرنگی و بەردەوامیی یارمەتییەکان و هاریکاری هاوبەش لەگەڵ پێشمەرگە بۆ بەرەنگاربوونەوەی تیرۆر و مەترسییەکانی کردەوە، لەپێناو سەقامگیریی و ئاسایشی ناوچەکە.

دۆزینەوەی چارەسەری ئاشتییانە بۆ ململانێ و ئاڵۆزییە هەنووکەییەکانی ناوچەکە لەگەڵ پرۆسەی چاکسازی و یەکخستنەوەی پێشمەرگە، تەوەرێکی دیکەی کۆبوونەوەکە بوو.